ΘΕΟΝΥΜΦΙΚΟΝ. ΠΑΤΗΡ ΔΙΟΝΥΣΙΟΣ ΤΑΜΠΑΚΗΣ.

 

ΤΡΙΤΗ

 

Ἦχος α΄. Πανεύφημοι Μάρτυρες.

Χαίροις πόλις ἔμψυχε Θεοῦ,Χαῖρε Μητροπάρθενε.Χαῖρε Θεόνυμφε Δέσποινα.Χαῖρε Παράδεισε, τῆς ζωῆς ἐν μέσῳ ξύλον ἐκβλαστήσασα , Χριστόν τόν Ζωοδότην καί Κύριον,ὄν καθικέτευε,μητρικαίς σου νῦν δεήσεσι τοῦ ρυσθῆναι κινδύνων τούς δούλους σου.

Χαῖρε τό κατάσκιον Θεοῦ,ὅρος ἀπειρόγαμε, ὁ Ἀββακούμ ἐθεάσατο. Χαῖρε πολύευκτον , κάλλος Θεοτόκε. Χαῖρε θεία τράπεζα,τόν ἄρτον τόν οὐράνιον φέρουσα, Χριστόν τόν Κύριον, ὄν ἱκέτευε τούς δούλους σου ἀπό πάσης ρυσθῆναι κακώσεως.

Χαῖρε τό παλάτιον Θεοῦ,Λόγου Παναμώμητε, ἐν ὤ οἰκήσας ἐκαίνωσε, φθαρέντας ἅπαντας. Χαῖρε ἡ τόν στάχυν,τῆς ζωῆς βλαστήσασα ἀσπόρως Θεοτόκε Πανύμνητε, ὄν νῦν δυσώπησον,διαθρέψαι ἄρτῳ πράξεων, ἐναρέτων τήν ψυχήν μου δέομαι.

Ἦχος β΄.Οἴκος τοῦ Εὐφραθᾶ.

Χαῖρε θρόνε Θεοῦ,Παντάνασσα Μαρία,Χριστιανῶν ἡ δόξα.Καύχημα τῶν παρθένων,νύφη ἠλιοστάλακτε.

Χαῖρε ἡ τήν χαράν, πηγάσασα τῷ κόσμῳ,ὑπεραγία Κόρη,βροτῶν τέ καί Ἀγγέλων τό ἔξοχον ἀγλάϊσμα.

Χαῖρε σκεῦος ἁγνή, τοῦ οὐρανίου μύρου,ἄνθος τῆς ἀφθαρσίας.Χαῖρε ρόδον καί κρῖνον,εὐωδιάζον ἅπαντας.

 

Ἦχος γ΄. Μεγάλη του Σταυροῦ σου.

Χαίροις ὑπεραγία Λόγον ἅγιον, Ὑψίστου δεξαμένη,ἐν τῇ γαστρί σου Κόρη. Χαῖρε κῦδος τίμιον τῶν ὀρθοδόξων,χαῖρε αῢλων ἀγγέλων εὐπρέπεια.Χαῖρε Θεόνυμφε, τό προσφύγιον πάντων.

Χαῖρε κάλλος πάγχρυσον καί πολυέραστον,τῆς οἰκουμένης πάσης, Μαρία Θεοτόκε.Χαῖρε θεία παράκλησις τῶν θλιβομένων.Χαῖρε τῶν ἀσθενούντων ἁγνή ἐπίσκεψις.Χαῖρε πυρίμορφε τοῦ Κυρίου καθέδρα.

Χαῖρε στύλε παρθενίας ἀκλινέστατε.Χαῖρε παντευεργέτις,τῶν σέ ὑμνολογούντων.Χαῖρε παλάτιον χρυσαυγές Βασιλέως.Χαῖρε ὁ μέγας ἐν μικρῷ κόσμος Πάναγνε.Χαῖρε κεφάλαιον τῆς ἠμῶν σωτηρίας.

Ἦχος δ΄. Ὡς γενναῖον ἐν Μάρτυσιν.

Χαῖρε θείων δυνάμεων, ἀγαλλίαμα Δέσποινα.Χαῖρε Ἀποστόλων τό σεμνολόγημα.Χαῖρε Μαρτύρων στεφάνωμα, ὁσίων τό καύχημα,Ἀσκητῶν, Ἱεραρχῶν,Προφητῶν περιήχημα.Ἀνωτέρα τέ ποιημάτων ἁπάντων Θεοτόκε. Καί Ἀγγέλων καί ἀνθρώπων τό περιβόητον ἄκουσμα.

Χαῖρε σκήνωμα ἅγιον,τοῦ Δεσπότου τῆς κτίσεως.Χαῖρε Θεοτόκε.Χαῖρε Πανάσπιλε. Χαῖρε λυχνία ὁλόφωτε. Χαῖρε πόλις ἔμψυχε.Χαῖρε γέφυρα θνητούς, πρός ζωήν ἡ μετάγουσα.Χαῖρε ἄμωμε,Παναγία Παρθένε.Χαῖρε μόνη τά ἐπίγεια τοῖς ἄνω, τῇ σῇ κυήσει ἐνώσασα.

Χαῖρε πύλη χρυσήλατε.Χαῖρε θρόνε πυρίμορφε.Χαῖρε ἀγλαόχρυσε θεία Τράπεζα.Χαῖρε χρυσόπλοκε θάλαμε, χλαμύς ἀλουργόχροε.Χαῖρε ἅρμα φωτεινόν.Χαῖρε σκήνωμα ἔνδοξον. Χαῖρε τέμενος, ἀστραπόμορφον, χαῖρε τῆς ψυχῆς μου ἡ εὐπρέπεια καί κάλλος Παρθενομῆτορ Θεόνυμφε.

 

Ἦχος πλ΄α΄.Χαίροις ἀσκητικῶν.

Χαίροις ἡ νοητή κιβωτός,δι’ἤς βροτοί κατακλυσμοῦ ἐλυτρώθημεν καί ζάλης τῆς ἁμαρτίας,Θεογενῆτορ ἁγνή,τό λαμπρόν του  Κόσμου ἐγκαλώπισμα,σεμνή καί τῆς πίστεως τό στερρότατον ἔγερμα.Χαῖρε λυχνία φωταυγής καί ὑπέρλαμπρος,ἡ τό ἄστεκτον ἐν κοιλίᾳ σου ἄμωμε,φῶς τό πανυπερούσιον ἀσπόρως βαστάσασα.Χαῖρε κατάρας ἡ λύσις καί εὐλογίας ἀντίδοσις.Χριστοῦ χαῖρε Μήτηρ,τοῦ παρέχοντος τό κόσμω τό μέγα ἔλεος.

Χαίροις ἡ μαργαρίτην Χριστόν, ἐξ ἀστραπῆς τῆς θειοτάτης κυήσασα,τούς σκότει τῆς ἀγνωσίας καί τούς ἐν βάθει δεινῶν,συσχεθέντας μόνη ὁδηγήσασα,πρός φῶς τό τῆς γνώσεως,ὑπερύμνητε Δέσποινα.Χαῖρε νεφέλη,φωταυγής καί ὑπέρλαμπρε.Χαῖρε καύχημα Ἀποστόλων καί κήρυγμα,θέαμα περιβόητον,ἐξαίσιον ἄκουσμα.Χαῖρε δοχεῖον τοῦ Κτίστου καί καθαρόν ἐνδιαίτημα,Θεοῦ ὄν δυσώπει ταῖς ψυχαίς ἠμῶν δοθῆναι τό μέγα ἔλεος.

Χαίροις ἀνατολή νοητή, ἡ ἐκ λαγόνων τόν Χριστόν ἀνατείλασα,πληροῦντα τήν οἰκουμένην,φωτός ἀρρήτου ἁγνή,τό τῶν ἀσωμάτων ἀγαλλίαμα.Ἀμνόν Θεοῦ αἴροντα, ἁμαρτίας ἡ τέξασα,παντός του κόσμου,τόν τροφέα καί πρύτανιν,ἡ θηλάσασα καί ἀγκάλαις κρατήσασα.Μόνη ἡ ἀδιάφθορος,ἁγνή καί ἀμόλυντος .Χαῖρε Ἅγια Ἁγίων τόν ὑπεράγιον Κύριον,ἀεί δυσωποῦσα,μή ἐλλίπης Θεοτόκε ὑπέρ τῶν δούλων σου.

Ἦχος πλ΄β΄. Τριήμερος ἀνέστης.

Χαῖρε βασιλευόντων Ἁγνή,τό θάρσος τό ἀνίκητον.Χαῖρε κλέος τῶν πιστῶν σου τήν σεπτήν,Εἰκόνα προσκυνούντων.Χαῖρε δαιμόνων πτῶσις καί τῶν ἀνθρώπων ἡ ἀνόρθωσις.

Χαῖρε τῆς  σωτηρίας ἠμῶν,ἀρχή καί ρίζα Πάναγνε.Χαῖρε μέσον,τό λαμπάδιον Χριστόν, κεκτημένη λυχνία. Χαῖρε γῆς ὑπερτέρα καί οὐρανοῦ Μαρία Δέσποινα.

Χαῖρε τιμιωτέρα σεμνή.Κτίσεως πάσης Ἂχραντε,ὁρατῆς τέ νοητῆς ὡς ὑπέρ νοῦν,ἀμφοτέρων τεκοῦσα,Δεσπότην Θεοτόκε.Χαῖρε ψυχῆς μου ἀγαλλίαμα.

 

 

Ἦχος βαρύς. Οὐκ ἔτι κωλυόμεθα.

Χαῖρε Θεόν,ἀφράστως ἀποτεκοῦσα,τόν θεώσαντα, τῇ αὐτοῦ καταβάσει Κόρη τόν ἄνθρωπον.

Χαῖρε παντός του κόσμου,δεδοξασμένη καταφύγιον καί Ἀγγέλων καί ἀνθρώπων ἔξοχον ἄκουσμα.

Χαῖρε τό φῶς τοῦ κόσμου,Παρθενομῆτορ,ὑπέρ ἔννοιαν καί ἀρρήτως,εὐλογημένη σαρκί κυήσασα.

Ἦχος πλ΄δ΄. Ὤ τοῦ παραδόξου θαύματος.

Χαῖρε πυρίμορφον ὄχημα.Χαῖρε αὐγή μυστική,ἐν τῷ κόσμῳ ἡ τέξασα,τόν λαμπρόν καί ἄδυτον καί ἀνέσπερον ἥλιον.Χαῖρε κογχύλη πορφύραν βάψασα,ἐκ σῶν αἱμάτων τῷ Βασιλεῖ τοῦ παντός. Χαῖρε Πανάχραντε. Χαῖρε φυλακτήριον πάντων πιστῶν,τῶν προσκαλουμένων σέ, ἐν πεποιθήσει ψυχῆς.

Χαῖρε πεσόντων ἀνόρθωσις. Χαῖρε πεινώντων τροφή. Χαῖρε πλοῦτε ἀσύλητε καί πενόντων Ἂχραντε, θησαυρός ὁ ἀκένωτος. Τῶν ἀσθενούντων χαῖρε ἐπίσκεψις,τῶν θλιβομένων χαῖρε παράκλησις.Χαῖρε βοήθεια,τοῖς προσκαλουμένοις σέ καί ἀρραγές , ὅπλον καί ὀχύρωμα, καί τεῖχος ἄρρηκτον.

Χαῖρε μυστικέ Παράδεισε,ξύλον ζωῆς τόν Χριστόν,ἐν κοιλίᾳ σου φέρουσα καί τεκοῦσα ἄφθορε,εἰς ἠμῶν ἀναβίωσιν,τῶν νεκρωθέντων,γεύσει τοῦ ξύλου ποτέ καί τῷ θανάτῳ ὑποκυψάντων κακῶς.Χαῖρε παμπόθητε καί παντομνημόνευτε χαῖρε βροτοῖς,θείαν ἀγαλλίασιν παρεχομένη ἀεί.